Трэнер каманды Лукашэнкі — сярод новых кіраўнікоў завода АКБ пад Брэстам

25/05/2020 - 09:26

У акумулятарнага завода пад Брэстам змяніўся ўласнік. Як паведамляе TUT.by, месца падкантрольнай бізнесмену Віктару Лемяшэўскаму кампаніі "Белінвестгандаль-Сплаў" занялі два бізнесмены, якія маюць "моцны хакейны бэкграўнд".

Завод пад Брэстам чатыры гады таму пачынала будаваць кампанія "АйПаўэр". Яе ўладальнікам якраз была фірма "Белінвестгандаль-Сплаў", а абедзве структуры ўваходзяць у 1AK-GROUP. Яе саўласнікам з'яўляецца бізнесмен Лемяшэўскі. І вось у 1AK-GROUP паведамілі, што прадпрыемства з 22 траўня 2020-га выведзена з пад яе кантролю: "У ходзе здзелкі быў здзейснены продаж 100% доляў у статутным фондзе ТАА "АйПаўэр". Завод ужо называецца ТАА "Акумулятарны Альянс". Яго новыя гаспадары вядуць перамовы "з шэрагам буйных еўрапейскіх інвестараў па ўваходжанні ў капітал завода".

Адзіны дзяржрэгістр юрыдычных асоб сведчыць, што статутны фонд новага ўласніка прадпрыемства складае 6,7 млн рублёў. 85% кампаніі належыць Сяргею Кагановічу, 15% — Дзмітрыю Баскаву. Кагановіч — намеснік дырэктара кампаніі "Семь Холмов Бел", захапляецца хакеем, раней удзельнічаў у спаборніцтвах з удзелам хакейнай каманды кіраўніка дзяржавы. Баскаў — гендырэктар хакейнага клуба "Дынама-Мінск", член савета дырэктароў БСБ Банка (як і Сяргей Кагановіч), трэніруе каманду Лукашэнкі.

Як паведамляла Еўрарадыё, будаўніцтва акумулятарнага завода пад Брэстам выклікала хвалю незадаволенасці ў мясцовых жыхароў, якія лічаць, што прадпрыемства пагражае іх здароўю. Больш за два гады кожную нядзелю на плошчы Леніна ў абласным цэнтры праходзяць сустрэчы праціўнікаў акумулятарнага завода ("кармленне галубоў"). У чэрвені 2019-га Брэсцкі аблвыканкам прыпыніў будаўніцтва "да ліквідацыі выяўленых парушэнняў", а генпракуратура пачала праверку. Тым часам КДБ распачаў крымінальныя справы супраць Віктара Лемяшэўскага за хабарніцтва. Аднак яшчэ летась бізнесмена і іншых фігурантаў справы выпусцілі з следчага ізалятара да суда.

У пачатку лютага сёлета Эканамічны суд вынес рашэнне па пазове Брэсцкага аблвыканкама да "АйПаўэр" аб вяртанні 5,7 млн рублёў. Кампанія атрымала іх з інавацыйнага фонду на будаўніцтва прадпрыемства. Падставай для пазову называлася не выкананне ўмоваў дамовы аб выдзяленні сродкаў.

У красавіку кампанія атрымала станоўчае заключэнне дзяржаўнай экалагічнай экспертызы па праекце будаўніцтва завода, а таксама дазвол на выкіды забруджвальных рэчываў у атмасферу. Планавалася, што ў другім квартале ён пачне працу. Аднак неўзабаве Галоўдзяржбудэкспертыза прыняла рашэнне прыпыніць дзеянне свайго заключэння. Падставай для гэтага назвалі інфармацыю аб крыніцах фінансавання будаўніцтва завода.