У Баранавічах Ціханоўскую і "баявых сябровак" сустрэлі хлебам-соллю
Кандыдатка ў прэзідэнты Святлана Ціханоўская разам з прадстаўніцамі аб'яднанага штабу Марыяй Калеснікавай і Веранікай Цапкала працягвае агітацыйнае турнэ па краіне. Сёння ў Баранавічах жанчын-палітыкаў сустрэлі хлебам-соллю.
"Жадаем вам здароўя, поспехаў, і каб вы набралі 76%, — так вітаў Святлану і кампанію жыхар Баранавічаў Мікалай Чарнавус. — 24 пакінем ім".
ТаксамаМікалай узгадаў Яўгена Васількова з Хойнікаў — блогера-трактарыста, які быў затрыманы 1 жніўня нібыта за непадпарадкаванне міліцыі.
"Я б хацеў, калі вы станеце прэзідэнтам, пастаўце яго старшынёй сельскага савету", — папрасіў Мікалай Чарнавус. Публіка вітала гэтыя словы ўсмешкамі і авацыяй.
Пасля мітынгу ў Баранавічах, які, па падліках праваабарончага цэнтру "Вясна" наведала больш за 7000 чалавек, Святлана Ціханоўская з "баявымі сяброўкамі" адправіцца ў Брэст.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.
