У дзень свайго 60-годдзя памёр прапагандыст Юрый Азаронак
Юрый Азаронак / БЕЛТА
У чацвер, у дзень свайго 60-годдзя памёр прапагандыст Юрый Азаронак. "Па сукупнасці хвароб", — піша пра прычыну смерці бацькі яго сын, прапагандыст Рыгор Азаронак.
Азаронак-старэйшы разгарнуўся на беларускім тэлебачанні ў 1990-я гады. Ён вёў праграму "Тайныя спружыны палітыкі" на БТ, зняў сумнавядомы дакументальны фільм "Нянавісць. Дзеці хлусні", паказаны перад рэферэндумам 1995 года. У ім праводзіліся паралелі паміж калабарантамі часоў Другой сусветнай вайны і беларускай апазіцыяй, ганьбілася нацыянальная сімволіка.
У 2005-м Юрыя Азаронка прызначылі намеснікам старшыні Белтэлерадыёкампаніі, але праз тры гады звольнілі за "ўчынак, не сумяшчальны з дзяржслужбай". У 2014-м прапагандыст вярнуўся да "працы па спецыяльнасці" — у аддзел інфармацыі і грамадскіх сувязяў Упраўлення справамі Лукашэнкі. "Складаны характарам — не з усімі на дзяржаўнай службе ён ужываўся", — піша Рыгор Азаронак.
Азаронка пахаваюць у Лепелі "на зямлі продкаў".
