У Лідзе працягваюцца затрыманні на прадпрыемствах
Міліцыя ў Гродзенскай вобласці / ivyenews.by
У Лідзе працягваюцца затрыманні на прадпрыемствах. Праваабаронцам стала вядома, што сілавікі прыходзілі ў мясцовую жыллёва-камунальную гаспадарку. 28 верасня ў дарожна-эксплуатацыйнай вытворчасці ЖКГ затрымалі каля 7 мужчын узростам 40-45 гадоў за "экстрэмісцкія" пасты і каментары ў сацсетках. Пасля затрымання нікога з іх не адпусцілі. З'явіўся загад усіх звольніць, як "парушальнікаў парадку".
Раней стала вядома пра звальненне ў ЖКГ да заканчэння кантракту чатырох чалавек (сярод іх — траіх праграмістаў). Мяркуецца, што кіраўніцтва атрымала "зверху" спіс з іх прозвішчамі.
У верасні затрыманні адбыліся на прадпрыемствах "Лакафарба", "Лідахлебапрадукт", "Белтэкс Оптык".
