Ва Украіне заклікаюць даць званне Героя Украіны беларусу Эдуарду Лобаву

Ва Украіне заклікаюць даць званне Героя Украіны загінуламу беларусу Эдуарду Лобаву. Ініцыятарам стаў яго камандзір Іван Завяршынскі. Ён стварыў адпаведную петыцыю на сайце прэзідэнта Украіны.

Лобаў служыў у 72-й асобнай механізаванай брыгадзе Узброеных сіл Украіны. 26 студзеня ён загінуў пад Вуглядарам. Завяршынскі піша, што гэта была геройская смерць.

"У сваім апошнім баі Эдуард Лобаў сваімі дзеяннямі выратаваў маё жыццё, — піша Іван Завяршынскі. — Расіяне высадзілі дэсант недалёка ад нашых пазіцый. Эдуард выйшаў з акопа і спакойна адзінкавымі стрэламі з аўтамата расстраляў усіх ворагаў. Менавіта гэтыя дзеянні дазволілі эвакуяваць мяне з поля бою. Смяротнае раненне Эдуард Лобаў атрымаў ад трапляння асколка танкавага снарада, калі страляў па варожым танку з Javelin. Гэта быў блізкі бой і экстранна эвакуяваць Эдуарда з поля бою не было магчымасці".

Лобаву было 34 гады. Ён — былы сустаршыня "Маладога фронту". У войску служыў у Віцебску ў паветрана-дэсантнай брыгадзе. Быў у зняволенні ў Беларусі ў 2010-2014 гадах, прызнаваўся палітвязнем. З лета 2015-га ваяваў за Украіну, быў у складзе Тактычнай групы "Беларусь". Ваяваў Лобаў супраць расійскіх акупантаў і пасля 24 лютага 2022-га, удзельнічаў у абароне Кіева, Чарнігава, Бахмута, Вуглядара, меў узнагароды.

У красавіку 2022-га быў пасмяротна ўзнагароджаны зоркай Героя Украіны баец Сіл спецыяльных аперацый беларус Аляксей Скобля (пазыўны "Тур").