Ветэран дае Лукашэнку тыдзень на выкананне свайго абяцання
Калі ж да таго часу для ветэранаў не адменяць аплату транспартнага падатку, то адпаведны артыкул пра падман з’явіцца ў прэсе, абяцае Фелікс Шкірманкоў
Адмяніць транспартны падатак могуць для ветэранаў Другой сусветнай вайны паабяцаў Аляксандр Лукашэнка ветэрану вайны Феліксу Шкірманкову. Абяцанне гэтае кіраўнік краіны даў 26 красавіка падчас візіту ў горад Слаўгарад Магілёўскай вобласці.
Вечарам 8 траўня, распавядае Еўрарадыё ветэран, пра адмену транспартнага падатку для ветэранаў да Дня Перамогі ён так нічога і не пачуў.
Фелікс Шкірманкоў: “Пачакаю: святы пройдуць, яшчэ трошачкі, а там — паглядзім! Я сумняюся… Хаця, з іншага боку, яму ж там павінныя былі падказаць, калі ён сам не ўцяміў, што калі ты не выканаеш тое, што абяцаў, то ветэран абавязкова напіша ў “Народную волю” пра тое, як яго падмануў прэзідэнт. Ці патрэбна яму гэта? Ён жа пачаў ужо выбарчую кампанію, можна так лічыць!”
Адразу пасля размовы з Лукашэнкам сябра БНФ Фелікс Шкірманкоў заўважыў: “Паглядзім, што значыць слова прэзідэнта і як яно будзе, бо да 9 траўня засталося 11 дзён”. Зараз ён дае кіраўніку краіны тыдзень на тое, каб той выканаў сваё абяцанне. Калі, кажа ветэран, нічога не зменіцца за гэты час, будзе пісаць ліст у газету. Бо, упэўнены Фелікс Шкірманкоў, пісаць нейкія звароты ў прэзідэнцкую адміністрацыю ці яшчэ куды проста не мае сэнсу.
