Воркаўт-пляцоўкі ў Беларусі: фітнес-трэнер і траўматолаг пра рызыкі і карысць

— Напрыклад: "Да заняткаў дапускаюцца дзеці ці падлеткі, у якіх няма супрацьпаказанняў для заняткаў спортам" або "Трэніруючыся на воркаўт-пляцоўцы, вы разумееце і прымаеце рызыку атрымання траўмы". Я бачыў, як на адной з такіх пляцовак у Польшчы было напісанае: "Заходзячы на пляцоўку, вы ацанілі навыкі свайго арганізма і ведаеце, як абыходзіцца з трэнажорамі". Яшчэ ўсюды вісяць шыльдачкі, як правільна імі карыстацца, па пунктах распісана, як прысядаць, падымаць і дзе якія мышцы трэніруюцца. Не ведаю, ці ёсць такія правілы на беларускіх пляцоўках, але хацелася б, каб іх хаця б у будучыні ўстанавілі.

Акрамя гэтага, Айзатулін звяртае ўвагу, што было б нядрэнна, калі б мінімум раз у квартал хтосьці правяраў стан абсталявання на наяўнасць дэфектаў або скрыўленняў. Яшчэ ён адзначае, што на такіх пляцоўках патрэбныя камеры відэаназірання — каб пазбегнуць вандалізму, распіцця алкаголю і ў выпадку атрымання траўмаў можна было хутка разабрацца, хто мае рацыю, хто вінаваты.

“Абсалютна неанатамічныя”

Па словах лекара, часцей за ўсё воркаўт-пляцоўкі абсалютна стандартныя, як у Беларусі, так і ў Еўропе.

— З аднаго боку, я магу дакладна сказаць, што яны абсалютна неанатамічныя і нефізіялагічныя, а з другога — чалавек, які туды прыходзіць, наўрад ці правядзе там занадта шмат часу. А калі зразумела, што трэнажор наогул не падыходзіць, чалавек альбо падладзіцца, альбо проста не будзе хадзіць. У любым выпадку, шкоды для здароўя ніякага не будзе, паколькі гэта больш забаўляльнае абсталяванне. А пляцоўка ўсё роўна знойдзе свайго спажыўца.

Самае галоўнае — тэхніка бяспекі

Музыкант і фітнес-трэнер Павел Аракелян таксама перакананы, што воркаўт-пляцоўкі не больш небяспечныя, чым звычайныя гульнявыя. Самае галоўнае — каб дзеці знаходзіліся пад наглядам дарослых і былі азнаёмленыя з тэхнікай бяспекі і прынцыпамі працы трэнажораў.

— Бацькам варта звярнуць увагу на ўсе трэнажоры з актыўнымі рухомымі элементамі, не выкарыстоўваць іх як арэлі і сачыць, ці не засталася на іх вага пасля папярэдняга карыстальніка.

Самая галоўная рэкамендацыя для ўсіх узростаў — прытрымлівацца тэхнікі бяспекі.

— Калі вы займаецеся з дзецьмі, то старайцеся не даваць ім практыкаванні на дробныя мышцы — яны траўманебяспечныя і проста непатрэбныя дзіцяці. Таксама не рабіце практыкаванні з вялікай восевай нагрузкай (напрыклад, прысяданні з гірай) і наогул старайцеся пазбягаць вялікіх вагаў на трэнажорах, калі дзіцяці яшчэ няма 12 гадоў. Тут ёсць просты лайфхак: калі ў дзіцяці атрымаецца зрабіць не менш 12 паўтораў з зададзенай вагой — тады працаваць з ёй цалкам бяспечна, а ў практыкаваннях на цягу (напрыклад, падцягванні) падтрымлівайце дзіцяці.

Аракелян папярэджвае, што вулічныя трэнажоры далёкія па якасці ад прафесійнага абсталявання ў трэнажорных залах.

— Трэнажоры могуць быць нязручнымі і нават небяспечнымі ў залежнасці ад антрапаметрыі чалавека, таму без спецыяльных ведаў я б рэкамендаваў хадзіць у трэнажорную залу да спецыялістаў, а воркаўт-пляцоўку пакінуць як дадатковы спосаб хутка патрэніравацца, пабавіць час з сям'ёй альбо паразмаўляць з сябрамі.