З 17 тысяч беларусаў 3 тысячы не змаглі пацвердзіць крыніцы сваіх даходаў

У мінулым годзе даходы і выдаткі 17 тысяч беларусаў зацікавілі падатковыя органы. З іх больш за 3 тысячы не змаглі пацвердзіць крыніцы сваіх даходаў, выдаткаваных на набыццё маёмасці і на іншыя мэты. Пра гэта падчас онлайна на сайце БЕЛТА паведаміў начальнік упраўлення падаткаабкладання даходаў і маёмасці фізічных асоб Міністэрства па падатках і зборах Андрэй Кавалеўскі. Паводле яго слоў, падаткавікі выставілі гэтым тысячам жыхароў нашай краіны да выплаты падаходны падатак у памеры 4,8 млн рублёў (гэта каля 2,4 млн долараў). Атрымліваецца, каля 1600 рублёў (каля 800 долараў) на чалавека.

Кавалеўскі не паведаміў, колькі чалавек са згаданых трох тысяч заплацілі падатак.