За каментар супраць міліцыянта бацьку двух маленькіх дзяцей далі 2 гады "хіміі"

22 лютага суд Першамайскага раёна Віцебска прызнаў 28-гадовага Аляксея Капітонава вінаватым у абразе прадстаўніка ўлады ў сувязі з выкананнем ім службовых абавязкаў (артыкул 369 Крымінальнага кодэкса). Яму прысудзілі два гады абмежавання волі з накіраваннем у папраўчую ўстанову адкрытага тыпу ("хімія"), пішуць "Народныя навіны Віцебска".

Па версіі суда, 3 кастрычніка 2020 года віцяблянін абразіў міліцыянта-кіроўцу роты патрульна-паставой службы міліцыі грамадскай бяспекі АУС адміністрацыі Першамайскага раёна Віцебска. Мужчына напісаў у Instagram каментар, дзе ў непрыстойнай форме абражаў пацярпелага сілавіка і выказваў негатыўную ацэнку. 

Міліцыя апублікавала відэа з Капітонавым. З яго словаў вынікае, што каментар датычыў моманту затрымання жанчыны і распылення слезацечнага газу. 

На судзе віцяблянін цалкам прызнаў сябе вінаватым. Суд улічыў чыстасардэчнае раскаянне і наяўнасць на ўтрыманні Капітонава двух малалетніх дзяцей. 

Прысуд пакуль не набыў законную моц і можа быць абскарджаны і апратэставаны ў вызначаным законам парадку.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.