За Лукашэнку і рускі свет: як партыі ў Беларусі імітуюць апазіцыю

31/08/2023 - 11:48

У Беларусі засталіся ўсяго чатыры партыі / калаж Улада Рубанава, Еўрарадыё

У Беларусі засталіся ўсяго чатыры партыі / калаж Улада Рубанава, Еўрарадыё

У пачатку 2023 года ў Беларусі было 15 палітычных партый. Пасля распачатай уладамі абавязковай перарэгістрацыі засталося ўсяго чатыры. Гэта "Белая Русь", Ліберальна-дэмакратычная партыя Беларусі (ЛДПБ), Камуністычная партыя Беларусі (КПБ) і Рэспубліканская партыя працы і справядлівасці (РППС).

— І хтосьці зараз скажа, што няма апазіцыі. Хлусня, — заявіў кіраўнік ЛДПБ Алег Гайдукевіч. Паводле ягоных слоў, не трэба блытаць "апазіцыю і пятую калону". Маўляў, у партый, якія засталіся, розныя праграмы, значыць — гэта апазіцыя.

Еўрарадыё даведалася, ці ёсць сярод іх хаця б намёк на апазіцыю і як праўладныя аб'яднанні цягнуць у Беларусь рускі свет.

“Прэзідэнцкі курс”

За Лукашенко и русский мир: как партии в Беларуси имитируют оппозицию

Алег Раманаў атрымлівае пасведчанне аб рэгістрацыі новай партыі, пакуль іншыя чакаюць перарэгістрацыі / Міністэрства юстыцыі

Першай прайшла рэгістрацыю партыя "Белая Русь". Гэта не дзіўна. На сайце партыі гаворыцца:

— Наша праца заснаваная на ясных прынцыпах прэзідэнцкага стратэгічнага курсу развіцця краіны.

У самой партыі парадачак — вясной 2023 года Алега Раманава выбралі старшынёй партыі аднагалосна. Акрамя гэтай пасады, ён яшчэ член Савета Рэспублікі.

Раманаў вядомы рускасветнымі поглядамі. У траўні ён фактычна прызнаўся ў злачынстве. Аказалася, што партыя "Белая Русь" і "Рассупрацоўніцтва" "дапамагаюць" Данбасу — вывозяць адтуль дзяцей.

Логіку лідара ЛДПБ Алега Гайдукевіча спасцігнуць складана / Sputnik

ЛДПБ таксама ўхваленая беларускімі ўладамі. Кіраўнік партыі — дэпутат Алег Гайдукевіч. Ён рэгулярна дазваляе сабе гамафобныя выказванні, сварыцца на Захад, падтрымлівае "СВА" і размяшчэнне расійскай ядзернай зброі ў Беларусі.

Кіраўнік партыі камуністаў Расіі Зюганаў і яго калега з Беларусі Аляксей Сокал / kprf.ru

Не абышлося ў Беларусі без камуністаў. Іх партыю ўзначальвае Аляксей Сокал — генеральны дырэктар Мінскага ЦУМа. Раней быў дэпутатам Палаты прадстаўнікоў.

Сокал выказвае безумоўную падтрымку Лукашэнку:

— Не проста падтрымка. Мы заўсёды ва ўсіх працэсах, якія наш кіраўнік дзяржавы праводзіць у жыццё, мы заўсёды падтрымліваем і знаходзімся побач з ім.

Сокал прасоўвае ідэю, якой любіць карыстацца Лукашэнка, — усюды нейкі вораг.

— Вораг спрабуе рознымі шляхамі ўнесці смуту і разлад унутры Беларусі. Каласальныя сродкі трацяцца на тое, каб ачарніць нашу краіну і РФ.

Вядома, без Расіі нікуды. Камуністы Беларусі пад крылом у расійскіх камуністаў. На з'ездзе старшыня Цэнтральнага камітэта Камуністычнай партыі Расіі Генадзь Зюганаў заявіў:

— Я максімальна буду падтрымліваць сваіх сяброў, я ўсё рабіў для таго, каб каманда Лукашэнкі ўмацавалася.

І за пратэсты, і за анексію Крыма

Кіраўнік РППС Аляксандр Хіжняк / rpts.by

Менш прыкметнае перарэгістраванае аб'яднанне — Рэспубліканская партыя працы і справядлівасці. Яе кіраўнік — дэпутат Мінскага гарсавета і дырэктар навукова-праектнага рэспубліканскага ўнітарнага прадпрыемства "БЕЛНДІПГОРАДАБУДАЎНІЦТВА" Аляксандр Хіжняк.

Хіжняк замяніў Васіля Задняпранага, які заявіў у 2020 годзе, што на вуліцы выйшлі пратэставаць зусім не наркаманы і прастытуткі. Зрэшты, Задняпраны падтрымаў анексію Крыма ў 2014 годзе і быў засмучаны, што ў Беларусі з паўвостравам прапалі нармальныя транспартныя зносіны.

Іншыя члены партыі актыўна прасоўвалі рускі свет. Напрыклад Эльвіра Мірсалімава, якая была намесніцай старшыні РППС па маладзёжнай палітыцы. У сваіх публікацыях яна называе беларускую культуру польскай ці літоўскай і вымярае "рускасць" у беларусах.

Праўда, яна больш не згадваецца як член РППС. На сайце партыі пра яе таксама нічога няма — мабыць, пасля сыходу Задняпранага і некаторых іншых членаў партыі ўсё пачысцілі. Аднак засталося расследаванне iSANS аб прарасійскіх актыўнасцях РППС.

Новы кіраўнік партыі звычайна выказваецца стрымана, але яму ўдалося вельмі дакладна апісаць, як людзі будуць атрымліваць дэпутацкія пасады:

— Усе партыі, якія на сённяшні дзень прайшлі перарэгістрацыю, — парламенцкія. І, на мой погляд, колькасць партыйных дэпутатаў і ў парламенце, і ў мясцовых саветах будзе расці. І гэта будзе сведчыць у тым ліку пра паспяховасць партыйнай дзейнасці.

Таксама СБ выпусціла тэкст з Хіжняком, які называецца "Партыі — кадравы фільтр і сацыяльны ліфт". Гэта значыць, партыі ў Беларусі, на думку Хіжняка, для таго, каб "фільтраваць кадры". А калі вы не ў партыі, якая падтрымлівае Лукашэнку, то нават мясцовым дэпутатам вам не стаць.

Выходзіць, усе партыі звязаныя з дзейнай уладай і заўважаныя ў прасоўванні прарасійскіх ідэй у Беларусі. Дзе ж апазіцыя, пра якую кажа Алег Гайдукевіч?