За стральбу ў аднаго з кіраўнікоў ДАІ Брэстчыны пенсіянер атрымаў 5 год калоніі

Як паведамляла Еўрарадыё, здарэнне адбылося раніцай 27 ліпеня ў кабінеце начальніка міжраённага аддзела ДАІ УУС Брэсцкага аблвыканкама падпалкоўніка міліцыі Юрыя Шыкунца. Пенсіянер прышоў да яго на прыём і здзейсніў некалькі стрэлаў з "самаробнага піратэхнічнага вырабу", але афіцэра нават не параніў (ён "аператыўна зрэагаваў, што дапамагло... пазбегнуць ранення"). Яго затрымалі. Следчы камітэт у лістападзе паведаміў, што напад быў здзейснены з помсты за прызначэнне штрафаў.

Вядома, што ў 2019 годзе пенсіянер прыцягваўся да крымінальнай адказнасці — абліў бензінам судовага выканаўцу. Ён атрымаў месяц арышту. Як паведамляе TUT.by, у абодвух выпадках Аляксандр Кавалевіч (імя і прозвішча асуджанага) здзяйсняў напады з-за штрафаў за краванне незарэгістраваным мапедам. Новы прысуд ён яшчэ можа абскардзіць. Лячыць яго будуць па месцы адбыцця пакарання.