Жыхарка Маладзечна вельмі хацела ў бальніцу і прыдумала напад на сябе

25-гадовая жыхарка Маладзечна вельмі хацела ў бальніцу і прыдумала напад на сябе. Яна паведаміла міліцыянерам, што ўвечары ў парку невядомы мужчына парэзаў ёй рукі нажом і забраў сумку, у якой былі 50 рублёў. Пры гэтым дзяўчына ўжо была дома, пасля нападу прайшла гадзіна. Як інфармуе прэс-служба маладзечанскай міліцыі, аператыўнікі, апытваючы пацярпелую, заўважылі нестыкоўкі ў яе паказаннях. Міліцыянеры вырашылі, што дзяўчына кажа няпраўду, і яна ў гэтым прызналася.

Па словах "пацярпелай", яна прыдумала гісторыю пра напад, паколькі спрабавала трапіць у бальніцу. Парэзы на руках нанесла сама. Яе кухонны нож аказаўся тупым, таму ўзяла нож у суседа. Дзяўчыну забрала "хуткая" і завезла ў прыёмны пакой бальніцы. Аднак яе агледзелі і адпусцілі дахаты. Тады і з'явілася ідэя прыдумаць гісторыю пра напад.

Сілавікі праводзяць праверку. Калі будзе распачатая крымінальная справа за заведама ілжывы данос, то жыхарцы Маладзечна пагражае да 5 гадоў пазбаўлення волі.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.