Актрыса Свабоднага тэатра, як мяркуецца, атрымала на акцыі пералом косткі чэрапа

Пасля 25 сакавіка актрыса Свабоднага тэатра Яна Русакевіч трапіла ў лякарню хуткай дапамогі. Падчас акцыі дзяўчына стукнулі дубінкай па галаве. Мяркуецца, што ў яе пералом косткі чэрапа, піша nn.by.

Дзяўчына кажа, што здымала акцыю на тэлефон. Потым яна трапіла ў хапун, яе пацягнулі ў аўтазак. "Я ім сказала, што я не хачу, каб яны мяне цягнулі і працягвала здымаць на відэа. Пасля я нават не зразумела, што мяне ўдарылі. Далей памятаю, што падышлі сябры і журналісты тэлеканала "Дождь". Яны паднялі мяне, я іх абняла і пайшлі ў бок філармоніі", — распавяла Русакевіч. 

Актрыса дабралася да "Галерэі Ў", дзе ёй стала блага. На таксоўцы яна паехала дадому, але ў дарозе дзяўчыну званітавала, і яна згубіла прытомнасць. Дома ёй стала яшчэ горш, і яна выклікала "хуткую". 

У лякарні хуткай дапамогі дздяўчыне зрабілі тамаграфію: здымак паказаў магчымую расколіну косткі чэрапа. Дактары вырашылі зрабіць паўторны здымак для пацверджання дыягназу. Зараз Русакевіч прызначылі ўколы. 

У лякарню прыехалі міліцыянты, якія зафіксавалі пабоі. Па словах Яны, яны пачалі крымінальную справу па факце збіцця. 

У дзяўчыны дыягнаставалі страсенне мозгу, ідзе лячэнне. Яна застанецца ў лякарні да канчатковага дыягназу і далейшага лячэння.