Аўтапрабег да Дня перамогі блакавалі каля Брэсцкай крэпасці за неаплату BelToll
Каля Брэсцкай крэпасці транспартная інспекцыя блакавала бусік міжнароднага аўтапрабегу да Дня Перамогі. Удзельнікам аўтапрабегу паведамілі, што яны не аплацілі праезд па платнай дарозе. За гэта з іх запатрабавалі 1040 еўра, піша "Брестская газета".
Міжнародны аўтапрабег "Эстафета памяці" стартаваў 5 красавіка. Яго ўдзельнікі выехалі з Брэста, Архангельска, Севастопаля, Дэрбента і з вострава Рускі ў Прыморскім краі. У Беларусі старт эстафеце быў дадзены на плошчы Цырыманіялаў у Брэсцкай крэпасці.
Пасля завяршэння афіцыйнай часткі ўдзельнікі прабегу вярнуліся на паркоўку каля мемарыяльнага комплексу, дзе стаялі іх аўтамабілі. У гэты момант іх і спыніла транспартная інспекцыя. Яе супрацоўнікі патлумачылі, што расіяне мусілі пры ўездзе ў Беларусь атрымаць і ўсталяваць бартавую прыладу BelToll, бо агульная маса мікрааўтобуса перавышала 3,5 т. Самі ўдзельнікі аўтапрабегу кажуць, што на ўездзе ў Беларусь ім пра гэта ніхто не паведаміў, хаця акцыя была ўзгодненая з уладамі.
Намеснік начальніка філіяла Транспартнай інспекцыі па Брэсцкай вобласці Віктар Алейнік паведаміў журналістам, што мікрааўтобус "наездзіў" чатыры парушэнні. Для аўтамабіляў з дапушчальнай агульнай масай звыш 3,5 т памер платы ў павялічаным памеры складае 260 еўра за адно парушэнне.
Сведка распавёў, што супрацоўнікі транспартнай інспецыі затрымалі бусік прыкладна на тры гадзіны. Супрацоўнікі расійскага консульства, якія былі ў аўтамабілі, паабяцалі выказаць беларускаму боку ноту пратэсту з гэтай нагоды.
