Буданаў бачыў "даволі непрыгожыя для Беларусі дакументы" пра ядзерную зброю
Кірыл Буданаў выказаўся пра расійскую тактычную ядзерную зброю ў РБ / Калаж УНІАН
Начальнік Галоўнага ўпраўлення разведкі Мінабароны Украіны Кірыл Буданаў у інтэрв'ю журналістцы Наталлі Масяйчук скептычна ацаніў магчымасць выкарыстання расійскай тактычнай ядзернай зброі, якая з'явілася ў Беларусі. Ён лічыць, што гэта проста "вялікая геапалітычная гульня".
"Дарэчы, адносна ядзернай зброі Беларусі, літаральна некалькі дзён таму першыя боегалоўкі былі дастаўленыя, — кажа Буданаў. — Да таго праводзіліся маштабныя трэніроўкі з ядзернымі імітатарамі. Я чытаў арыгіналы дакументаў па выніках трэніровак. Даволі непрыгожыя для Беларусі дакументы. Расійскае 12-е Галоўнае ўпраўленне (гэта ўпраўленне, якое адказвае за менавіта гэтыя сродкі), напісала, што па выніках трэніровак з ядзернымі імітатарамі для сістэмы "Іскандэр", якія ў невялікай колькасці ёсць у Беларусі, была прызнана поўная негатоўнасць Беларусі да эксплуатацыі прымянення падобнага ўзбраення".
Пра тое, што ў Беларусі плануецца размясціць расійскую тактычную ядзерную зброю, Уладзімір Пуцін заявіў 25 сакавіка 2023 года. У чэрвені ён паведаміў, што першыя ядзерныя зарады ўжо прывезлі ў Беларусь, а астатнія з'явяцца да канца года. У Крамлі падкрэслівалі, што кантроль за ядзернай зброяй застанецца ў руках расіян. Буданаў жа сцвярджае, што насамрэч ядзерныя зарады прывезлі толькі нядаўна.
Напярэдадні стала вядома, што ў РБ з Расіі прывезлі чарговы камплект аператыўна-тактычнага ракетнага комплекса "Іскандэр-М".
