Дваровыя супольнасці Мінска далучыліся да акцыі "0 праміле"
Акцыя ў падтрымку затрыманых лекара і журналісткі / @belhalat_by
У падтрымку лекара Бальніцы хуткай медыцынскай дапамогі Арцёма Сарокіна і журналісткі TUT.BY Кацярыны Барысевіч у дварах Мінска мінулым вечарам прайшлі акцыі салідарнасці. Людзі выстройваліся тварам да сцяны з паднятымі рукамі і прыціскалі да сцяны лісткі з надпісам "0%".
Такія акцыі, у прыватнасці, прайшлі ў жылым комплексе "Каскад", у мікрараёне Сухарава і ў Новай Баравой. Далучыліся да яе і работнікі хуткай дапамогі Мінска, паведамляе телеграм-канал "Белыя халаты".
Напярэдадні такую акцыю правялі супрацоўнікі Бальніцы хуткай медыцынскай дапамогі. Іх калегу анестэзіёлага Арцёма Сарокіна затрымалі па падазрэнні ў разгалошванні медычнай таямніцы і прадастаўленні "недакладнай інфармацыі". Гаворка ідзе пра артыкул на партале TUT.BY, у якім сцвярджалася са спасылкай на лекара БХМД, што затрыманы на "Плошчы Перамен" Раман Бандарэнка, які пазней памёр у лякарні, быў цвярозы. Па гэтай справе затрыманая і аўтар артыкула журналіст партала Кацярына Барысевіч, яна знаходзіцца ў СІЗА КДБ.
Між тым 26 лістапада Еўрапарламент правядзе тэрміновыя слуханні па сітуацыі ў Беларусі, падставай да якіх стала "парушэнне правоў чалавека, якое працягваецца, і, у прыватнасці, забойства Рамана Бандарэнкі".
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.
