Еўракамісія заклікае Лукашэнку не падтрымліваць расійскую агрэсію ва Украіне

Еўракамісія заклікае Аляксандра Лукашэнку ўстрымацца ад падтрымкі расійскай агрэсіі супраць Украіны. Пра гэта 10 кастрычніка паведаміў афіцыйны прадстаўнік ЕС па знешнепалітычных пытаннях Пэтэр Стана, піша Reuters.

У Еўракамісіі прапанавалі, каб беларускія ўлады неадкладна забаранілі расійскім войскам выкарыстоўваць тэрыторыю Беларусі для ўдараў па Украіне.

У іншым разе еўрасаюзаўскія структуры пагражаюць мінскаму рэжыму новымі санкцыямі. "Любыя далейшыя дзеянні — асабліва непасрэдны ўдзел беларускіх вайскоўцаў у гэтай вайне насуперак волі большасці жыхароў Беларусі — будуць сустрэтыя новымі і суровымі абмежавальнымі мерамі", — падкрэсліў Стана.

Між тым акурат сёння Лукашэнка заявіў, што Беларусь разам з Расіяй разгортвае на заходніх межах сумесную рэгіянальную групоўку войскаў. Чакаецца, што ў Беларусь прыбудуць тысячы расійскіх вайскоўцаў.