Фінляндыя афіцыйна абвясціла, што падае заяўку на ўступленне ў NATO
Прэм'ер-міністр Фінляндыі Санна Марын і прэзідэнт Саўлі Нііністэ / Reuters
Прэзідэнт Фінляндыі Саўлі Нііністэ і прэм'ер-міністр Санна Марын выступілі з сумеснай заявай пра ўступленне ў Паўночнаатлантычны альянс.
"Фінляндыя павінна неадкладна падаць заяўку на ўступленне ў NATO", — гаворыцца ў заяве.
У найбліжэйшыя дні пра рашэнне зрабіцца чальцом Паўночнаатлантычнага альянса афіцыйна абвесціць і Швецыя. Прычым Стакгольм і Хельсінкі могуць уступіць у NATO па паскоранай працэдуры, сцвярджае дыпламатычная крыніца ТАСС у Брусэлі. Яны змогуць прапусціць этап атрымання і выканання Плана дзеянняў, які неабходны для членства ў альянсе.
Акрамя таго, "і сам працэс перамоў пра прыём будзе гранічна паскораны з прычыны высокай зацікаўленасці альянсу ў прыёме гэтых краін-партнёраў і высокай ступені гатоўнасці іх войскаў да інтэграцыі ў вайсковыя структуры NATO", — адзначыла крыніца.
Фінляндыя і Швецыя заявілі пра жаданне ўступіць у NATO пасля нападу Расіі на Украіну.
"Мы не можам заставацца безабароннымі перад Расіяй, якая не выконвае міжнародныя законы", — казала, у прыватнасці, прэм'ер-міністр Фінляндыі Санна Марын у інтэрв'ю японскім СМІ.
