Фонд спартовай салідарнасці адмаўляецца ад грошай, сабраных на марафоне
Марафон салідарнасці "Нам не ўсё адно!" / кадр з відэа
Беларускі фонд спартовай салідарнасці (BSSF) адмаўляецца ад грошай, сабраных падчас марафону салідарнасці з палітвязнямі "Нам не ўсё адно!". Пра гэта гаворыцца ў адмысловай заяве фонду.
BSSF падкрэслівае, што вызваленне і падтрымку палітычных зняволеных лічыць адной з прыярытэтных задачаў беларускага грамадства. Разам з тым фонд вырашыў, што дапамагаць пацярпелым ад палітычных рэпрэсій беларускім спартоўцам і спартовым спецыялістам будзе "ў рамках раней наладжаных непублічных механізмаў".
"Сродкі, на якія мог бы прэтэндаваць BSSF у якасці аператара, будуць размеркаваныя паміж іншымі арганізацыямі, якія падтрымалі марафон, для аказання адраснай падтрымкі палітычным вязням", — гаворыцца ў заяве BSSF.
На марафоне салідарнасці з палітвязнямі беларусы сабралі больш за 570 тысяч еўра. Гэтыя грошы, як было абвешчана, атрымаюць праваабарончыя арганізацыі і ініцыятывы, якія дапамагаюць палітвязням і іх родным.
