Хто не згуляе ў хакей? Ужо 4 краіны не хочуць ехаць на чэмпіянат у Мінску

11/01/2021 - 09:21

Лёс мінскай часткі чэмпіянату свету па хакеі — 2021 дагэтуль невядомы. Кіраўніцтва Міжнароднай федэрацыі кажа, што пытанне будзе вырашанае да канца студзеня. У той жа час шэраг краін заявіў пра тое, што ЧС не варта праводзіць у Беларусі. А той-сёй ужо агучвае намеры байкатаваць чэмпіянат, калі яго "пакінуць" Мінску.

Хто заклікае перанесці ЧС-2021 з Беларусі?

Фінляндыя

Адна з найбольш хакейных краін свету — Фінляндыя — супраць правядзення ЧС у Мінску. Прэм'ер-міністр Санна Марын кажа, што чэмпіянат у Мінску нельга праводзіць праз "вельмі складаную сітуацыю" з правамі чалавека.

Данія

Спартыўныя функцыянеры Даніі дапускаюць, што іх зборная байкатуе ЧС-2021, калі IIHF не перанясе яго з Мінска. Пра гэта кажа дырэктар хакейнага саюза краіны Ульрык Ларсэн:

"Мы не хочам, каб наша зборная выступала на чэмпіянаце свету ў Мінску. Мы хочам, каб чэмпіянат свету прайшоў у іншай краіне".

Хто яшчэ?

Пра неабходнасць пераносу ЧС з Мінску заяўлялі і шматлікія палітыкі, у тым ліку — з Нарвегіі, ЗША, Германіі, Літвы, Польшчы і, вядома, Латвіі, якая мусіла б прымаць спаборніцтвы разам з Беларуссю.

З тых, хто публічна падтрымаў Мінск, — толькі Расія. Але і ў Масквы ёсць свой інтарэс: старшыня Федэрацыі хакея Расіі Уладзіслаў Траццяк казаў, што, “калі што”, Расія гатовая разгледзець магчымасць правесці беларускую частку чэмпіянату ў сябе.

Калі будзе канчаткова вырашаны лёс мінскай часткі ЧС?

Кіраўнік IIHF Рэнэ Фазэль 11 студзеня абмяркоўвае лёс чэмпіянату з Аляксандрам Лукашэнкам. Пры гэтым канчатковае рашэнне ён абяцаў абвясціць у канцы месяца.

У адрозненне ад Беларусі ў IIHF усё вырашае не толькі прэзідэнт, але і іншыя топ-функцыянеры. Мае вагу і меркаванне розных краін. Ці можаце вы сабе ўявіць чэмпіянат па хакеі без Даніі, Швецыі, Фінляндыі, Чэхіі?

З іншага боку, калі плюнуць на імідж і прадстаўніцтва, такі паварот падзей, безумоўна, выгадны для Лукашэнкі. На чэмпіянаце без праблем пераможа Расія, а Беларусь згуляе ў фінале і зойме другое месца. І ўсе задаволеныя!