Капскі: Футбалістаў з БАТЭ Ганчарэнка не забярэ
Старшыня праўлення ФК БАТЭ ў чарговы раз пракаментаваў сыход галоўнага трэнера каманды Віктара Ганчарэнкі ў расійскую "Кубань".
Анатоль Капскі запэўнівае: няма пагрозы, што за Ганчарэнкам у расійскі клуб прэм'ер-лігі пераедуць і некаторыя гульцы БАТЭ.
"Я ведаю, што зводзіць гульцоў ён у нас не будзе — Віктар Міхайлавіч вельмі прыстойны чалавек, — цытуе словы старшыні праўлення ФК БАТЭ "Прессбол". — Тым не менш заракацца не варта. Ніколі не кажы "ніколі". Сёння футбаліст выступае ў БАТЭ, а заўтра ў іншай камандзе. Можа быць, і ў "Кубані". Чаму не? Але пакуль пра гэта разважаць недарэчна. Ганчарэнку ж яшчэ толькі трэба будзе азнаёміцца з сітуацыяй у яго новай камандзе".
Тым не менш, паўабаронца БАТЭ і нацыянальнай зборнай Беларусі Аляксандр Глеб ужо заявіў, што калі Віктар Ганчарэнка пакліча ў "Кубань", ён не будзе супраць.
Віктар Ганчарэнка і Вадзім Скрыпчанка ў "Кубані" (фота, відэа)
На здымку Віктар Ганчарэнка і Анатоль Капскі. Фота — fcbate.by
