КДК затрымаў супрацоўнікаў фірмаў, якія займаліся пастаўкамі лекаў і медтэхнікі

Сілавікі затрымалі супрацоўнікаў пяці прыватных кампаній, якія пастаўлялі медыцынскія і фармацэўтычныя тавары ў медыцынскія ўстановы, паведамляе прэс-служба Камітэта дзяржкантролю. Колькасць затрыманых і назвы кампаній не агучваюцца.

Паведамляецца, быццам работнікі прыватных кампаній дамаўляліся з замежнымі вытворцамі тавараў пра пастаўку ў Беларусь праз фальшывых пасярэднікаў. Пастаўкі афармляліся праз падкантрольныя замежныя арганізацыі. А тыя прадавалі яе беларускім кампаніям, павялічыўшы цану на тавары па асобных пазіцыях у чатыры-пяць разоў. Розніца ў расцэнках асядала на рахунках замежных фірмаў-пасярэднікаў, якія кантраляваліся беларускімі кампаніямі.

Дзяржкантроль налічыў шкоду ў выглядзе нявыплачаных дзяржаве падаткаў на суму больш за 8,9 мільёна рублёў.

На заснавальнікаў і кіраўнікоў кампаній пачалі крымінальныя справы. Двух фігурантаў затрымалі ў пункце пропуску "Лоша", калі яны спрабавалі выехаць за мяжу.

У падазраваных канфіскавалі больш за 250 тысяч долараў і 55 тысяч еўра. На маёмасць падазраваных (у тым ліку нерухомасць і машыны) наклалі арышт.