Лукашэнка і Парашэнка сустрэнуцца ў Кіеве раніцай 21 ліпеня
![Лукашэнка і Парашэнка сустрэнуцца ў Кіеве раніцай 21 ліпеня](/sites/default/files/styles/gallery_main/public/2023-08/prez.jpg.webp?itok=FC3G3uPq)
20 ліпеня пачынаецца афіцыйны візіт Аляксандра Лукашэнкі ва Украіну. Прэс-служба беларускага лідара паведамляе, што ў Кіеве "запланаваныя перамовы з прэзідэнтам Украіны Пятром Парашэнкам, якія пройдуць у фармаце "сам-насам" і ў пашыраным складзе".
З графіка Пятра Парашэнкі вынікае, што сустрэча з Аляксандрам Лукашэнкам адбудзецца раніцай 21 ліпеня і працягнецца не больш за паўтары гадзіны. Яна пачнецца ў 11:00, а ў 12:30 прэзідэнты зробяць сумесную заяву для СМІ.
Як Лукашэнка з Парашэнкам паспеюць за паўтары гадзіны і "сам-насам", і "ў пашыраным складзе", пакуль незразумела.
Але ў кіраўніка Беларусі вялікія планы: "Чакаецца, што па выніках перамоваў у прысутнасці лідараў дзвюх краінаў будзе падпісаны шэраг дакументаў, якія тычацца супрацоўніцтва ў эканоміцы, навукова-тэхнічнай галіне, а таксама ў сферах культуры і міжнацыянальных адносінаў", — паведамляе прэс-служба Аляксандра Лукашэнкі.