Маці-адзіночка атрымала "хімію" за вясёлы смайлік, які абразіў міліцыянера
Маці-адзіночка з Івацэвічаў атрымала 2 гады "хатняй хіміі" за каментар у тэлеграм-чаце ў выглядзе вясёлага смайліка пад фота міліцыянера (выкарыстала тры эмоджы з гаўняшкай), паведамляюць праваабаронцы. Гэта палічылі абразай прадстаўніка ўлады. Суд праходзіў у закрытым рэжыме (хадайніцтва заявіў пацярпелы).
Таксама жанчына павінна будзе выплаціць міліцыянеру 2 тысячы рублёў кампенсацыі.
Жыхарцы Івацэвічаў Вользе 33 гады. Раней яна распавядала "Нашай Ніве", што каментар пад пастом напісала ў канцы восені 2020 года, а ў сярэдзіне снежня да яе прыйшлі міліцыянеры. Па дарозе ў пастарунак яна сказала ім: "Прасіць прабачэння на камеру я не буду — калі шукаеце чарговую лахушку, каб паказаць па тэлебачанні, то не на тую патрапілі".
