Мінабароны пра збіты беспілотнік: Інфармацыю вывучаем, каментароў няма

28 траўня непадалёк ад вёскі Картыжы Мсціслаўскага раёна Магілёўскай вобласці беларускія ваенныя збілі беспілотнік — такую інфармацыю падаў партал TUT.by са спасылкай на невядомага “відавочцу”. Паводле яго словаў, збіты самалёт нібыта, падобны да “БПЛА “Птэра-G0”, са складу беспілотнага авіяцыйнага комплексу  “Птэра-СМ” расійскай вытворчасці”. Самае цікавае, што такіх апаратаў няма на ўзбраенні беларускай арміі.

У Міністэрстве абароны Беларусі не пацвярджаюць, але і не абвяргаюць інфармацыю пра збіты беспілотнік.

“Міністэрства абароны вывучае дадзеную інфармацыю. На гэты момант падстаў для каментароў у нас няма”, — заяўляе Еўрарадыё кіраўнік прэс-службы Мінабароны Уладзімір Макараў.

Ва Упраўленні ваеннай контрвыведкі КДБ таксама не здолелі ніякім чынам пракаментаваць інфармацыю. Маўляў, сілы супрацьпаветранай абароны ў любым выпадку падпарадкоўваюцца ваенным. А па словах “відавочцы”, праз хвілін 10 пасля падзення беспілотніка на месца здарэння прыехалі беларускія ваенныя.