Мінскае метро аднавіла працу, міліцыя рыхтуе заяву
Сталічнае метро не працавала каля трох гадзінаў — з-за паведамлення пра нейкія "падазроныя прадметы". Іх шукалі на ўсіх станцыях.
На гэты час пасажырам рэкамендавалі карыстацца наземным грамадскім транспартам. Дадаткова на маршруты выйшлі 55 аўтобусаў, 48 тралейбусаў, 6 трамваяў, маршрут 100-га аўтобуса працягнулі да прыпынку "Уручча".
У цэнтры сталіцы былі заўважаныя перасоўванні аўтазакаў. Некалькі аўтазакаў дзяжурылі каля чыгуначнага вакзала, побач з выхадам са станцыі метро "Плошча Леніна".
Да 18-й гадзіны мінскае метро запрацавала. Як паведаміў Еўрарадыё прэс-афіцэр сталічнай міліцыі Аляксандр Ластоўскі, цяпер рыхтуецца заява па сённяшніх падзеях.
