Мінская медсястра прайграла суд паліклініцы

Суд вырашыў, што іск па паляпшэнні працоўных умоў і ўсталяванні вентыляцыі ў хірургічным кабінеце, дзе працуе медсястра, трэба вылучыць у асобнае вядзенне.

Прадстаўнік істца Васіль Ваўчок — муж Галіны Буян — хадайнічаў аб адмове ад часткі іску. Рэч у тым, што за час разбору адно са спагнанняў, накладзеных на медсястру, працадаўца адмяніў сам. Суддзя Таццяна Дарашчонак задаволіла хадайніцтва.

А вось па астатніх патрабаваннях суд Ленінскага раёна адмовіў Галіне Буян. Суддзя Дарашчонак палічыла, што ісцец сапраўды здзейсніла некалькі дысцыплінарных правіннасцяў, а таксама што склад працоўнай камісіі, якая наклала на яе адно са спагнанняў, быў правамоцным. Суд таксама не задаволіў просьбу аб змене некалькіх пунктаў працоўнай дамовы на падставе таго, што медсястра Галіна Буян лічыла, што яны пагаршаюць яе працоўную дзейнасць. З пункту гледжання дзейнага заканадаўства, заявіла суддзя Дарашчонак, гэтыя пункты ніяк не пагаршаюць становішча медсястры.

Абскардзіць рашэнне суда Ленінскага раёна медсястра Галіна Буян і яе прадстаўнік Васіль Ваўчок могуць на працягу 15 дзён.