Паветраныя шарыкі з Бельгіі даляцелі да беларускіх Лельчыцаў (відэа)
Незвычайная гісторыя адбылася з паветранымі шарыкамі, запушчанымі ў неба ў Бельгіі, піша інтэрнэт-газета "Салідарнасць".
Адзін з рэстаранаў у бельгійскай правінцыі Усходняя Фландрыя у Дзень закаханых запусціў у неба паветраныя шарыкі ў выглядзе сэрца. Да шарыкаў былі прымацаваныя падарункавыя сертыфікаты. Арганізатары разлічвалі, што шарыкі знойдзе нехта з мясцовых жыхароў і выкарыстае сертыфікаты ў рэстаране.
Аднак у гэтыя дні ў Бельгіі бушаваў ураган "Дэніс". Ён знёс шарыкі з сертыфікатамі ў невядомым напрамку.
А праз некалькі дзён з рэстаранам праз сацыяльныя сеткі звязаўся жыхар беларускіх Лельчыцаў і паведаміў, што знайшоў шарыкі і падарункавы сертыфікат. Выявілася, што шарыкі праляцелі дзве тысячы кіламетраў.
Віталь Бажан кажа, што быў на рыбалцы і пабачыў шарыкі. Мужчына вырашыў забраць іх дадому, каб парадаваць дзяцей.
"Я быў упэўнены, што яны з вяселля ці нешта гэтага кшталту, але жонка пераклала, што карты — гэта падарункавыя сертыфікаты. Яна была ўпэўненая, што яны аднекуль з Беларусі. Але потым мы знайшлі відэа, якое іх адпраўлялі ў паветра ў Бельгіі. Як мы здзівіліся!" — кажа жыхар Лельчыцаў.
Цяпер бельгійскі рэстаран шукае спосаб, як узнагародзіць беларускую сям'ю, якая знайшла паветраныя шарыкі.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.