Польшча і Беларусь вядуць перамовы пра вызваленне Пачобута — Radio ZET

Перамовы пра вызваленне журналіста-палітвязня Анджэя Пачобута вядуць Польшча і Беларусь, паведамляе Radio ZET са спасылкай на дыпламатычную крыніцу.

Як адзначаецца, перамовы вядуцца на ўзроўні чыноўнікаў ніжэйшага звяна МЗС і консульскай службы. Польскі бок пагражае закрыць грузавы рух на мяжы.

Актывіст польскай меншасці ў Беларусі і журналіст Анджэй Пачобут асуджаны на 8 гадоў калоніі. Праваабаронцы прызналі яго прысуд палітычным. Польшча патрабуе вызвалення Пачобута ўвесць час ад яго затрымання.

У панядзелак намеснік кіраўніка МЗС Польшчы Анджэй Шэйна ў эфіры радыёстанцыі ZET назваў тры ўмовы нармалізацыі стасункаў Варшавы і Менска. Адна з умоваў — вызваленне Пачобута ды іншых палякаў. Іншыя ўмовы — спыненне гібрыдных атак на мяжы і супраца ў расследаванні справы аб гібелі польскага жаўнера пасля нападу мігранта з тэрыторыі Беларусі.

Паводле Radio ZET, выкананне гэтых умоваў можа стаць падставай для перамоваў аб адкрыцці дадатковых пунктаў пропуску на мяжы.