Прэзідэнт Еўрапарламента заклікаў аэрапорты ЕС размясціць фота Пратасевіча
Прэзідэнт Еўрапарламента Давід Сасолі заклікаў аэрапорты Еўрасаюза размясціць у тэрміналах фатаграфіі беларускага палітвязня Рамана Пратасевіча. "Мы вітаем мэтавыя і персанальныя санкцыі супраць прадстаўнікоў беларускага рэжыму, блакаванне палётаў над Беларуссю авіякампаніям ЕС і меры супраць беларускіх авіякампаній, у тым ліку "Белавія", — цытуе словы Сасолі прэс-служба Еўрапарламента. — Я таксама думаю, што было б вельмі пазітыўным жэстам, калі б фота Рамана дэманстравалася ў асноўных аэрапортах Еўрасаюза ў знак салідарнасці".
Кіраўнік Еўрапарламента лічыць,што такая акцыя "паказвала б, што мы не падвядзем яго".
Раман Пратасевіч і яго дзяўчына Сафія Сапега былі затрыманыя ў мінскім аэрапорце падчас прымусовай пасадкі пасажырскага самалёта Ryanair, які ляцеў з Грэцыі ў Літву. Іх вызвалення патрабуюць лідары ЕС, прэзідэнт ЗША.
