Рэнэ Фазэль: беларускі ўрад пагадзіўся на адкрыты дыялог з апазіцыяй

13/01/2021 - 09:13

Пасля вяртання з Мінска кіраўнік Міжнароднай федэрацыі хакея Рэнэ Фазэль даў інтэрв'ю сайту iihf.com.

Візіт Фазэля ў Беларусь выклікаў шмат пытанняў. У інтэрнэце многія абурыліся сяброўскімі абдымкамі прэзідэнта ІІХФ і Аляксандра Лукашэнкі. Таксама пытанні ўзніклі пасля сумеснага фота Фазэля і кіраўніка беларускай Федэрацыі хакея Дзмітрыя Баскава, супраць якога ІІХФ вядзе расследаванне.

Па словах Фазэля, у Мінску ён сустракаўся з Лукашэнкам: "На сустрэчы прысутнічалі прэм'ер-міністр Беларусі і міністр спорту, а таксама іншыя прадстаўнікі мясцовага аргкамітэта і беларускай федэрацыі хакея з шайбай".

Фазэль запэўніў беларускі бок, што пазіцыя ІІХФ не змянілася і яна хоча, каб чэмпіянат свету 2021 года прайшоў у Мінску і Рызе. "Але змянілся многае іншае: ІІХФ глыбока занепакоеная здольнасцю арганізатара ў Мінску бяспечна правесці турнір ва ўмовах COVID-19, ІІХФ працягвае расследаванне сітуацыі вакол кіраўніка федэрацыі хакея з шайбай, і ў краіне назіраюцца хваляванні, якія значна паўплывалі на падрыхтоўку да турніру і выклікалі шэраг абгрунтаваных апасак з боку камандаў, заўзятараў і дзяржаўных чыноўнікаў", — кажа прэзідэнт Міжнароднай федэрацыі хакея.

Фазэль таксама заявіў, што гатовы на перамовы з беларускай апазіцыяй, калі гэта дапаможа палепшыць сітуацыю ў Беларусі.

А беларускія ўлады, па яго словах, гатовыя да дыялогу і перамен: "Асабіста я думаю, што многія людзі недаацэньваюць здольнасць урада Беларусі рухацца наперад, мадэрнізаваць і прыняць новую Канстытуцыю ў краіне. Гэта не адбудзецца раптоўна, мы ведаем гэта і павінны даць гэтаму час, але ўсё, што ІІХФ можа зрабіць, каб прасунуць парадак дня, мы робім".

Гаворачы пра магчымае правядзенне чэмпіянату ў Мінску, Фазэль прызнаў, што беларускія ўлады не прытрымліваюцца міжнародных стандартаў у супрацьстаянні COVID-19. "Гэта не адпавядае міжнародным стандартам, якія мы чакалі б ад чэмпіянату свету, але мы атрымалі абяцанне ўрада прытрымлівацца ўсіх правілаў ІІХФ", — расказаў ён пра чарговыя абяцанкі афіцыйнага Мінска.

Як вядома, у першую хвалю каранавіруснай пандэміі Аляксандр Лукашэнка раіў лячыцца хакеем, трактарам, козачкамі і гарэлкай. У другую хвалю было абвешчана, што беларускі шлях, абраны ў першую хвалю, самы правільны.

Асобна ў Фазэля папыталіся наконт расследавання ІІХФ супраць Дзмітрыя Баскава. Яго падазраюць у дыскрэдытацыі хакея як віду спорту. У тым ліку фігуруе абвінавачанне ў дзеяннях на "Плошчы Перамен", калі там быў выкрадзены і да смерці збіты Раман Бандарэнка.

"Беларусь пагадзілася супрацоўнічаць з ІІХФ і правесці ацэнку ўсіх адпаведных паказанняў сведкаў, відэа і іншых доказаў для падтрымкі дысцыплінарнага савета ІІХФ у яго ўласным расследаванні. Яны прызналі сур'ёзнасць гэтых абвінавачанняў і паабяцалі сабраць усе магчымыя факты. ІІХФ працягне сваё незалежнае расследаванне і будзе чакаць атрымання доказаў ад генеральнага пракурора, якія дапамогуць у гэтым расследаванні", — растлумачыў прэзідэнт ІІХФ.

Між тым у Беларусі па факце смерці Рамана Бандарэнкі крымінальную справу так і не пачалі нават праз два месяцы пасля яго смерці.