Піт Паўлаў: "Новыя песні слухачы ўспрымаюць крышачку без увагі і неахвотна"

110801 Zybluk NRM.mp3

Канцэртамі ў Слуцку і Магілёве, літаральна, на гэтых выходных скончыўся так званы летні тур N.R.M., з якім, па словах Піта Паўлава, музыканты аб’ехалі амаль усю Беларусь. Падчас гэтых канцэртаў гурт планаваў знайсці сабе новага вакаліста і афіцыйна аб’явіў пра гэта на сваім сайце.

Як высветлілася па выніках туру, вакалістамі N.R.M. будуць не адзін, а адразу тры чалавекі.

"Зараз ў гурце тры вакалісты. Гэта Юрась Ляўкоў, Алезіс Дземідовіч і Піт Паўлаў", – распавёў Еўрарадыё Піт Паўлаў.

Але, кажа Піт, магчыма, склад гурта ўсё-такі пашырыцца.

Піт Паўлаў: "Пакуль мы нічога не вырашалі. Яно неяк так само паволі "устаканілася". Мы ехалі ў тур і ўвесь час спявалі. І зараз спяваем. Пакуль усё выглядае вось так. А паколькі ў нас усё адбываецца само сабой, стыхійна, і няма такога – вось мы вырашылі, што так і будзе – мы ўсё правяраем стыхійна".

Геаграфія тура N.R.M. гэтым разам захапіла нават месцы, куды музыканты яшчэ ні разу не прыязджалі.

Піт Паўлаў: "У нас быў канцэрт нават у такім маленечкім закутку, як выспа на возеры Сялява. Ці, напрыклад, у Слуцку, дзе мы дагэтуль ні разу не былі. Зараз мы маем уласныя вынікі і досвед, і разумеем, што і як. А таксама маем фітбэк ад гледачоў – у нас з’явілася інфармацыя для аналізу".

Падчас гэтых выступаў музыкантам не пісалі ўжо традыцыйных для канцэртаў N.R.M. цыдулак, і амаль не задавалі пытанняў. Што тычыцца праграмы выступу – зараз N.R.M. спрабуе максімальна прыцягнуць увагу да новых песень.

"Мы нават перакрочваем мяжу. Таму што наш досвед сведчыць, што новых песень у канцэрце можа быць дзве, а лепш за ўсё адна,– тлумачыць Піт. - Калі болей – людзі пачынаюць сумаваць, не ўспрымаць і г.д. Зараз у нашых акустычных канцэртах больш за палову новых песень, а ў электрычных –больш за траціну. Гэта рызыкоўна, таму што новыя песні слухачы ўспрымаюць крышачку без увагі і неахвотна. Але мы ўсё ж такі рызыкуем, каб прывучыць людзей да новых песень".

У бліжэйшых планах гурта – вялікі канцэрт у Мінску, здымкі кліпа і выпуск новага альбома, над якім музыканты працуюць зараз. У параўнанні з папярэднім альбомам N.R.M. "06" (які музыканты запісалі яшчэ ў поўным складзе, – заўв.рэдакцыі) альбом будзе больш меладычным і іншым па гучанні – дзеліцца ўражаннямі Піт:

"Гэтыя змены звязаныя з вядомымі прычынамі – змяніўся склад гурта. Пакуль мы запісваем альбом сваім складам, але плануем запрасіць і сесійных музыкантаў, як гэта заўсёды было ў апошніх альбомах N.R.M. Могуць з’явіцца народныя інструменты".

Плануецца, што ў альбом увойдуць прыкладна 10 кампазіцый – прынамсі, над такой колькасцю трэкаў зараз працуюць музыканты. Працоўная назва альбома – "ДПБЧ".

"Такім чынам мы хочам увесці ва ўжытак беларусаў, нават рускамоўных, новую "фішку". Каб яны пісалі ў смсках літары "ДПБЧ" замест "пакуль" ды інш. Гэта значыць "Да пабачэння". І хутчэй за ўсё такую назву будзе мець загалоўная песня альбома".