Цела Кадафі агледзеў лекар
Зрынуты лівійскі лідар сканаў ад кулявых раненняў у галаву і жывот — такое заключэнне даў лекар, які агледзеў яго цела ў Місраце, паведамляе “Аль-Джазіра”.
Паводле розных звестак, Кадафі атрымаў раненні ў часе сутыкнення яго ахоўнікаў з прыхільнікамі Пераходнага нацыянальнага савета ў Сірце. Калі праціўнікі схапілі яго, палкоўнік быў яшчэ жывы.
Пасля захопу сіламі ПНС у жніўні сталіцы Лівіі Трыпалі пра лёс Муамара Кадафі дакладна нічога не было вядома. Перыядычна ён выступаў з аўдыёзваротамі праз размешчаны ў Сірыі спадарожнікавы канал “Ар-Рай”, заклікаючы сваіх прыхільнікаў супраціўляцца новым уладам і сілам НАТО.
