Рэжым пагражае адабраць у Святланы Алексіевіч яе мінскую кватэру — Ціханоўская

У беларускай пісьменніцы, нобелеўскай лаўрэаткі Святланы Алексіевіч могуць забраць яе кватэру ў Мінску. Пра гэта піша ў Х кіраўніца Аб'яднанага пераходнага кабінета Беларусі Святлана Ціханоўская: "Сусветна вядомая беларуская пісьменніца і лаўрэатка Нобелеўскай прэміі Святлана Алексіевіч ужо была вымушаная адправіцца ў выгнанне. Цяпер рэжым пагражае адабраць у яе мінскую кватэру ў якасці чарговага акта помсты. Тую самую кватэру, дзе еўрапейскія дыпламаты сабраліся, каб абараніць яе ў 2020 годзе".

Афіцыйна пра планы забраць у пісьменніцы кватэру ў РБ не заяўлялася. Але восенню з такой прапановай выступалі прапагандысты.

Алексіевіч ужо чацвёрты год вымушана жыве за мяжой — у Германіі. У 2020-м у Беларусі яна была ў складзе Каардынацыйнай рады, ёй пагражаў крымінальны пераслед (яе выклікалі на допыт у Следчы камітэт), за ёй сачылі. Аднойчы, калі ўзнікла пагроза затрымання, да Святланы Алексіевіч прыязджалі заходнія дыпламаты.

Кнігі пісьменніцы ў РБ правяралі "на наяўнасць экстрэмізму".

Святлана Алексіевіч была госцем праграмы Еўрарадыё “Ідэя Х”.