Сілавікі затрымалі адміністратара чата "Беларусы ў Партугаліі"

Сілавікі паведамляюць пра затрыманне адміністратара чатаў "Беларусы ў Партугаліі" і "Беларусы на Мадэйры". Медыязона піша, што затрыманага завуць Дзмітрый Гярко.

На відэа сілавікоў мужчына расказвае, што жыве на Мадэйры з 2019 года. У 2020 годзе стварыў чат "Беларусы на Мадэйры", а "потым праз нейкі час быў дададзены адміністратарам у чат "Беларусы ў Партугаліі". Мужчына кажа, што "пакідаў негатыўныя каментары пра супрацоўнікаў міліцыі і дзейнай улады". Быў таксама зарэгістраваны ў плане "Перамога". Ён перыядычна прыязджаў у Беларусь адведаць маці. Падчас чарговага прыезду і быў затрыманы.

У якім ён знаходзіцца статусе, што канкрэтна яму інкрымінуюць і дзе ён цяпер знаходзіцца, невядома.