Сіноптыкі распавялі, калі ў Беларусі пахаладае
Яшчэ ў аўторак Беларусь можа пацешыцца добрым надвор'ем. Пра гэта паведаміў начальнік службы гідраметэаралагічных прагнозаў Рэспубліканскага цэнтра па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды Дзмітрый Рабаў.
Уначы і зранку месцамі будзе туман. Ноччу па паўночным захадзе пройдуць невялікія дажджы. Удзень па захадзе краіны чакаюцца дажджы, у асобных раёнах — навальніцы. Тэмпература паветра ўначы будзе ад 13 да 19 цяпла, удзень чакаецца +23...+29 градусаў. Па захадзе Беларусі падчас дажджоў прагназуецца 19-22 вышэй за нуль.
Але ўжо з серады праз Беларусь пойдзе халодны атмасферны фронт з паўночнага захаду Еўропы.
У сераду на большай частцы тэрыторыі краіны прагназуюцца кароткачасовыя дажджы, удзень у асобных раёнах магчымыя навальніцы. Уначы будзе 11-18 градусаў цяпла, удзень 14-21 са знакам "плюс".
У чацвер уначы ў асобных раёнах, а ўдзень пераважна па паўночным захадзе Беларусі прагназуюцца кароткачасовыя дажджы. Днём месцамі чакаюцца навальніцы. У многіх раёнах краіны сіноптыкі прагназуюць вецер парывамі да 15-18 метраў за секунду. Уначы слупок тэрмометра пакажа +8...+14 градусаў, удзень — ад 15 да 22 са знакам "плюс". Па поўдні краіны будзе да 24 градусаў вышэй за нуль.
У пятніцу, 15 верасня, уначы і зранку на большай частцы тэрыторыі, а днём у асобных раёнах краіны пройдуць кароткачасовыя дажджы, месцамі навальніцы. Па поўначы Беларусі чакаюцца парывы ветру да 15-20 метраў за секунду. Тэмпература паветра ўначы будзе 9-16 градусаў цяпла, удзень — +12...+18, па поўдні краіны — да 20 са знакам "плюс".
