Святлана Алексіевіч — беларусам: Дарагія сябры, не адчайвайцеся!

Нобелеўская лаўрэатка, беларуская пісьменніца Святлана Алексіевіч 11 чэрвеня была на публічнай прэм’еры фільма Аляксея Палуяна "Кураж", які адбыўся на "Berlinale". Там яна сустрэлася са Святланай Ціханоўскай, якая знаходзіцца з візітам у Германіі, і запісала кароткі відэазварот да беларусаў.

"Дарагія сябры, не адчайвайцеся! — гаворыць Алексіевіч. — З намі адбылося летам мінулага года самае галоўнае: мы адчулі, што мы беларусы, што мы — нацыя. Мы гэта зрабілі, мы гэта зразумелі. Гэта назаўсёды застанецца ў нашай гісторыі, а самае галоўнае — у нашай свядомасці.

Вядома ж, перамога будзе. Можа яна будзе не так хутка, як нам бы хацелася...

Рыхтуйцеся да новага часу. І ён будзе... Трэба жыць рэвалюцыяй. І ў той жа час, трэба жыць справай... Для гэтага трэба ведаць, для гэтага [моладзі] трэба вучыцца, для гэтага патрэбны прафесіі. Інакш мы не ўвойдзем у гэты вялікі новы свет".