Таццяна Шчытцова: ЕГУ патрэбны прарэктар, які займаўся б беларускай павесткай

03/02/2023 - 15:34

“Інаўгурацыя адбылася. Адзначу, што бачу гэтага чалавека ўпершыню і першыя ўражанні пасля размовы з ім добрыя”, — расказвае Еўрарадыё дарадца Святланы Ціханоўскай па адукацыі Таццяна Шчытцова пасля сустрэчы з новым рэктарам Еўрапейскага гуманітарнага ўніверсітэта, польскім эканамістам Кшыштафам Рыбіньскім.

Трэцяга лютага пасля доўгай цішыні і інтрыгі, якая цягнулася некалькі месяцаў, імя галоўнага прадстаўніка ЕГУ нарэшце рассакрэцілі. ВНУ, якая калісьці была адной з самых папулярных у Беларусі, чарговы раз будзе прадстаўляць не грамадзянін нашай краіны.
Ці атрымаецца ў пана Кшыштафа зразумець нашую павестку, асабліва пасля рэпрэсій, звязаных з пратэстамі? Вось што кажа Таццяна Шчытцова, якая працуе ў ВНУ не першы год.

Таццяна Шчытцова / архіў Таццяны

Таццяна Шчытцова: У яго вельмі добры бэкграўнд — як менеджара, так і даследчыка. Ён прафесійна займаецца прасоўваннем штучнага інтэлекту ў галіне адукацыі. То-бок тут мае месца сукупнасць некалькіх істотных рысаў.

Падчас сустрэчы яе ўдзельнікі задавалі пытанні. Напрыклад, студэнты цікавіліся тым, як новы рэктар бачыць узаемадзеянне з імі і як студэнты могуць уплываць на тое, што адбываецца ва ўніверсітэце.

Я таксама задала пытанне — пра тое, што ЕГУ з’яўляецца ўніверсітэтам у выгнанні і як новы рэктар разумее гэтае вызначэнне. Акрамя таго, пытала, як ён бачыць ролю акадэмічнай супольнасці ў жыцці ўніверсітэта.

Еўрарадыё: Што адказваў Кшыштаф Рыбіньскі?

Таццяна Шчытцова: Падкрэсліў, што вельмі дэмакратычны з усімі чальцамі акадэмічнай супольнасці. Ён лічыць, што, натуральна, ва ўніверсітэце мусіць быць добрая атмасфера, а студэнты павінны ведаць адказы на пытанні што да іх стыпендыі і крытэрыяў навучання.

Карацей, студэнцкае жыццё павінна абмяркоўвацца на розных узроўнях разам са студэнтамі. Таксама яны павінны ўдзельнічаць у прыняцці адпаведных рашэнняў.
Усе яго прамовы сёння былі вельмі дэмакратычнымі.

Еўрарадыё: А як наконт ваша пытання што да беларускай сітуацыі?

Таццяна Шчытцова: Спадзяюся, што ў нас будзе больш магчымасцяў абмеркаваць гэтыя пытанні. Пакуль ён паказаў, што добра разумее і згодны з тым, што ўніверсітэт мусіць працаваць на грамадзянскую супольнасць і выпускаць студэнтаў, якія разумеюць свой грамадзянскі абавязак, а таксама што такое еўрапейская дэмакратычная прастора.

Ён падкрэсліў што вядзецца пра еўрапейскую ВНУ, а гэта задае пэўны ўзровень патрабаванняў і дапамагае вызначыць місію ўніверсітэта.

У мяне ёсць адчуванне, што праз камунікацыю з прадстаўнікамі беларускай акадэмічнай супольнасці ў новага рэктара будзе больш магчымасцяў пазнаёміцца з беларускім грамадствам і актуалізаваць сувязі беларускага і еўрапейскага.

Бо ЕГУ — гэта пляцоўка, дзе мусіць быць арганічнае спалучэнне беларускага і еўрапейскага. Грунтуючыся на тым, што сёння казаў новы рэктар, мяркую, што мы можам спадзявацца на развіццё ўніверсітэта ў добрым кірунку.

Еўрарадыё: Добра, калі на такія месцы прыходзяць прафесіяналы. Але ці не шкада, што на такой пасадзе ўжо даўно не было прадстаўніка з Беларусі?

Таццяна Шчытцова: Што да пасады, то як чалавек, які вельмі добра ведае сітуацыю ўнутры ўніверсітэта, скажу: я ўпэўненая, што цяпер універсітэту на пазіцыі рэктара вельмі патрэбны моцны менеджар з добрым міжнародным досведам, які будзе развіваць універсітэт. Патрэбны менавіта такі прафесіяналізм у галіне менеджменту еўрапейскага ўзроўню.