ТБМ ладзіць талаку, каб вызваліць офіс
Таварыства беларускай мовы ладзіць талаку, каб вызваліць свой офіс. Пра гэта ў сацсетках напісала старшыня арганізацыі Алена Анісім.
"Для таго, каб вызваліць усё з нашай сядзібы, мы арганізоўваем у суботу талаку. Пачатак у 12 гадзін. Кожны ўдзельнік зможа забраць на памяць якую-небудзь рэч, кнігу, газету. Шмат што будзе вывезена для захавання", — заявіла яна.
Таксама Анісім спадзяецца, што да канца месяца ТБМ здолее сабраць 3200 рублёў, каб разлічыцца за арэнду памяшкання.
Сядзіба ТБМ на завулку Румянцава, 13 цягам трыццаці гадоў была адным з цэнтраў беларускай культуры ў цэнтры Мінска. Тут ладзіліся прэзентацыі, выставы, можна было набыць беларускія кнігі, газеты, часопісы, музычную прадукцыю.
8 лістапада 2021 года Вярхоўны суд ліквідаваў юрыдычную рэгістрацыю ТБМ паводле пазову Міністэрства юстыцыі. Пагром недзяржаўных арганізацый доўжыцца ў Беларусі некалькі месяцаў. У нядаўнім інтэрв'ю Бі-Бі-Сі Аляксандр Лукашэнка, гаворачы пра НДА, паабяцаў "выразаць усіх мярзотнікаў".
