У Беларусь прыляцеў Пуцін
Уладзімір Пуцін прыляцеў у Нацыянальны аэрапорт "Мінск" / БЕЛТА
6 снежня ў Беларусь з Расіі прыляцеў Уладзімір Пуцін. Яго самалёт суправаджалі два знішчальнікі. У Мінску Пуцін паўдзельнічае ў пасяджэнні вышэйшага дзяржсавета саюзнай дзяржавы РБ і РФ. Папярэдні раз у Беларусь ён прылятаў у траўні.
У Нацыянальным аэрапорце "Мінск" госця з Масквы сустракаў прэм'ер-міністр Раман Галоўчанка.
Пасяджэнне дзяржсавета пройдзе пад старшынствам Аляксандра Лукашэнкі. Будзе разгледжаны "ход выканання асноўных напрамкаў рэалізацыі палажэнняў дамовы аб стварэнні саюзнай дзяржавы на 2024-2026 гады", а таксама падрыхтаваная канцэпцыя бяспекі саюзнай дзяржавы.
Чакаецца, што ў Лукашэнкі з Пуціным будзе асобная сустрэча.
У дзень прылёту Уладзіміра Пуціна дзяржсакратар Савета бяспекі РБ Аляксандр Вальфовіч расказаў, што ў Аляксандра Лукашэнкі ёсць і свой "ядзерны чамаданчык", і "чырвоная кнопка". Нібыта толькі ён можа аддаць каманду на выкарыстанне ядзернай зброі, якая знаходзіцца на тэрыторыі Беларусі. Відаць, гэта будзе навіной для Пуціна. Вальфовіч падкрэсліў, што яго словы — не жарт.
