У Беларусі другі раз за год зафіксавалі дэфляцыю

У жніўні ў Беларусі была зафіксаваная дэфляцыя. Як паведамляе Белстат, індэкс спажывецкіх цэн знізіўся на 0,3% у параўнанні з ліпенем.

Дэфляцыю ў нашай краіне фіксуюць сёлета другі раз. Папярэдні раз яе адзначалі па выніках траўня. Наступныя два месяцы індэкс спажывецкіх цэн у Беларусі павялічваўся.

Гадавая інфляцыя ў жніўні знізілася да 2,3% — у параўнанні з паказчыкам 2,7% у ліпені.

Цэны на харчовыя тавары ў мінулым месяцы знізіліся на 1% у параўнанні з ліпенем, на нехарчовыя — на 0,2%, на паслугі — на 0,3%.

Ад пачатку года цэны на харчовыя тавары выраслі на 2,2%, на нехарчовыя — на 1,3%, на паслугі — на 6,5%.

У параўнанні з жніўнем 2022 года харчовыя тавары сталі даражэйшымі на 3,4%, а нехарчовыя — таннейшымі на 2,6%. Тарыфы на паслугі павялічыліся на 7,2%.