У мінскай гімназіі №5 забаранілі заняткі ў спартзале
![У мінскай гімназіі №5 забаранілі заняткі ў спартзале](/sites/default/files/styles/gallery_main/public/2023-08/spotzala-3011.jpg.webp?itok=hYlQDs7l)
У мінскай гімназіі №5 забароненыя заняткі ў спартыўнай зале, бо на яе столі ўтварыліся расколіны. Адпаведнае рашэнне прыняла 29 лістапада камісія па надзвычайных сітуацыях пры адміністрацыі Партызанскага раёна Мінска, паведамляе прэс-служба МНС.
У гімназіі, размешчанай па вуліцы Мендзялеева, 14, навучаецца 955 чалавек.
Камісія вырашыла, што ўзімку на пакрыццё спартыўнай залы з-за снега павялічыцца нагрузка. А гэта можа прывесці да ўтварэння новых расколінаў і далейшай дэфармацыі столі.
Кіраўніцтва гімназіі спыніла заняткі ў зале, доступ у яе абмежаваны. Заняткі з дзецьмі часова праводзяцца ў малой спартзале.
Дарэчы, напярэдадні камісія па надзвычайных сітуацыях спыніла навучанне ў сярэдняй школе №4 у Асіповічах: там трывогу спецыялістаў выклікалі пліты перакрыцця на трэцім паверсе. Пакуль будзе ісці рамонт, заняткі з вучнямі гэтай школы будуць адбывацца ў мясцовай гімназіі.