У Пінску з ракі выратавалі п'яную жанчыну (фота)

Увечары 9 снежня пінскім ратавальнікам прыйшло паведамленне ад відавочцы, які заўважыў у рацэ Піне чалавека ў вадзе. На месца выкліку, як паведамляе прэс-служба МНС, былі накіраваныя ратавальнікі і медыкі.

Яны выявілі, што ў 60 метрах ад берага ў вадзе знаходзілася жанчына. Да яе на катары падплылі работнікі Асвода. Яны выцягнулі жанчыну і перадалі ратавальнікам для аказання першай меддапамогі.

Пацярпелай была 38-гадовая жанчына. Яе шпіталізавалі з папярэднімі дыягназамі агульнае пераахаладжэнне арганізма і алкагольная інтаксікацыя.

Пакуль яшчэ не вядома, як яна апынулася на сярэдзіне Піны.

Фота: mchs.gov.by