"Я лічу, не сам ён". У судзе па "справе Коржыча" дапыталі сведак

Роўна месяц у Мінску разглядаюць крымінальную справу аб гібелі 21-гадовага салдата тэрміновай службы Аляксандра Коржыча ў навучальным цэнтры ў Печах. Абвінавачванне выстаўленае тром сяржантам: Яўгену Бараноўскаму, Ягору Скуратовічу і Антону Вяжэвічу. 3 верасня ў судзе чыталі пісьмовыя матэрыялы справы.

4 верасня ў судзе быў дапытаны палкоўнік Канстанцін Чарнецкі. На момант трагедыі ён займаў пасаду начальніка 72-га гвардзейскага АНЦ. 20 кастрычніка Чарнецкі быў адхілены ад пасады ўказам Аляксандра Лукашэнкі.

Цела Аляксандра Коржыча знайшлі ў падвале медыцынскай роты вайсковай часткі 3 кастрычніка 2017 года. Ён правісеў у пятлі тыдзень. У салдата былі звязаныя ногі, а на галаву надзетая майка. Расследаванне гучнай справы доўжылася паўгода, разглядаліся тры версіі гібелі. У красавіку 2018 года Следчы камітэт паведаміў, што Коржыча давялі да самагубства калегі. Маці салдата ў гэтую версію не верыць, а пацярпелыя салдаты кажуць, што ў Аляксандра Коржыча не было прычын зводзіць рахункі з жыццём.