У Віцебску падчас заняткаў скандынаўскай хадзьбой затрымалі шэсць жанчын
Заняткі скандынаўскай хадзьбой / sb.by
Шэсць жанчын затрымалі раніцай у сераду ў Віцебску падчас прагулкі ў лесе. Жанчыны займаліся скандынаўскай хадзьбой.
"З самай раніцы ў Віцебску падчас прагулкі са скандынаўскімі палкамі ў Шпілеўскім лесе затрымалі шэсць віцебскіх жанчын", — напісала на сваёй старонцы ў Facebook дачка адной з затрыманых, вядомы педагог Ганна Севярынец.
Такім чынам, затрыманыя Таццяна Севярынец, Раіса Кухто, Людміла Фамінская, Людміла Валаткевіч, Алёна Каснова і Тамара Ільіна. Па словах Ганны Севярынец, жанчын даставілі ў Першамайскі РАУС Віцебска.
Пра сваё затрыманне Таццяна Севярынец паспела паведаміць мужу.
"Толькі што патэлефанавала Таццяна са сваёй ранішняй прагулкі з сяброўкамі: "Нас атачылі людзі ў чорным". Цяпер тэлефон не адказвае", — напісаў у Facebook Канстанцін Севярынец.
ТОЛЬКІ ШТО ПАЗВАНІЛА ТАЦЦЯНА СА СВАЙГО РАНІШНЯГА ШПАЦЫРУ З СЯБРОЎКАМІ: "НАС АТАЧЫЛІ ЛЮДЗІ Ў ЧОРНЫМ!!!" ЗАРАЗ ТЭЛЕФОН НЕ АДКАЗВАЕ...
Опубликовано Константином Северинцем Вторник, 12 января 2021 г.
Сын Таццяны і Канстанціна Севярынцаў Павел з 7 чэрвеня знаходзіцца ў зняволенні. Яго затрымалі за адміністрацыйнае правапарушэнне, але потым выставілі абвінавачванне па крымінальным артыкуле — удзел у масавых беспарадках (ч.2 арт. 293 КК). У канцы снежня яму чарговы раз падоўжылі тэрмін следства яшчэ на два месяцы — да 20 лютага 2021 года. Праваабаронцы прызналі яго палітвязнем.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.
