Выдавец Андрэй Янушкевіч трапіў у шорт-ліст прэміі Prix Voltaire 2024
Андрэй Янушкевіч
Міжнародная асацыяцыя выдаўцоў (IPA) абвясціла шорт-ліст прэміі Prix Voltaire 2024 у гонар выключнай мужнасці ў адстойванні свабоды кнігавыдання.
Сёлета ў яго ўвайшлі пяць чалавек і арганізацый, якія прадэманстравалі стойкасць і адвагу перад тварам цэнзуры і прыгнёту. У іх ліку беларускі выдавец Андрэй Янушкевіч, піша Беларускі ПЭН.
Рэжым Лукашэнкі пераследаваў Янушкевіча: яго выдавецтву адмаўлялі ў арэндзе памяшкання, кнігарню "Кнігаўка" зачынілі ў першы ж дзень працы, выдадзеныя кнігі прызнавалі "экстрэмісцкімі". Самога Янушкевіча, як і ягоных супрацоўнікаў, арыштоўвалі паводле надуманых абвінавачанняў, а выдавецтва ўрэшце пазбавілі ліцэнзіі.
У 2023 годзе Янушкевіч быў вымушаны пераехаць у Польшчу, дзе працягнуў выдавецкую дзейнасць і адкрыў кнігарню ў Варшаве.
Цырымонія ўручэння прэміі адбудзецца ў снежні 2024 года.
