Яшчэ 14 чалавек прызналі палітвязнямі

Беларускія праваабаронцы прызналі палітвязнямі яшчэ 14 чалавек. Гэта — Яўген Гормаш, Наталля Малец, Дзмітрый Сельвеструк, Дзмітрый Свічкароў, Сяргей Мазоль, Алеся Лянцэвіч, Аляксандр Коваль, Кацярына Бруханава, Наталля Шараметава, Ігар Цяпцееў, Віктар Грынько, Юрый Несцярэнка, Уладзімір Савельеў і Ігар Цікач. Праваабаронцы лічаць іх справы палітычна матываванымі і патрабуюць вызвалення.

Мазоль асуджаны па абвінавачванні ў "садзейнічанні экстрэмісцкай дзейнасці" да пазбаўлення волі ў папраўчай калоніі. Бруханава за тое самае асуджаная да 2 гадоў 6 месяцаў пазбаўлення волі ў папраўчай калоніі. Коваль асуджаны за перасылку відэа пратэснаму інфармацыйнаму рэсурсу да 2 гадоў 6 месяцаў пазбаўлення волі ў папраўчай калоніі. Лянцэвіч асуджаная па абвінавачванні ў "абразе службовай асобы", Аляксандра Лукашэнкі і за ахвяраванні ініцыятывам, прызнаным "экстрэмісцкімі" да 3 гадоў 6 месяцаў пазбаўлення волі ў папраўчай калоніі. Шараметава асуджаная па абвінавачванні ў "арганізацыі і падрыхтоўцы дзеянняў, якія груба парушаюць грамадскі парадак, альбо актыўным удзеле ў іх", "садзейнічанні экстрэмісцкай дзейнасці" да пазбаўлення волі ў папраўчай калоніі.

Цяпцееў, Грынько, Несцярэнка, Савельеў і Цікач асуджаныя да пазбаўлення волі ў папраўчай калоніі па абвінавачванні ў "хуліганстве групай асоб", "абразе А. Лукашэнкі", каментаванні ў інтэрнэце, "фінансаванні і садзейнічанні экстрэмісцкай дзейнасці" — за вывешванне беларускага нацыянальнага і ўкраінскага сцягоў.

Гормаш, Малец, Сельвеструк і Свічкароў змешчаны пад варту — за ахвяраванні ініцыятывам, прызнаным у РБ "экстрэмісцкімі". Яўгена Гормаша таксама абвінавачваюць ва ўдзеле ў пратэстах, "абразе Лукашэнкі", "уваходжанні ў склад экстрэмісцкага фармавання".

У Беларусі колькасць палітвязняў складае амаль паўтары тысячы чалавек.