За "небяспечныя" БЧБ-сцягі і карыкатуру на двух гамельчукоў пачалі "крыміналку"
На двух гамельчукоў пачалі крымінальную справу за хуліганства, паведамляе прэс-служба МУС. Нагодай сталі ўсталяваныя бел-чырвона-белыя сцягі і карыкатура.
Паведамляецца, што ў панядзелак, 16 лістапада, міліцэйскі патруль заўважыў бел-чырвона-белы сцяг, усталяваны на рагу Усходняга абыходу і вуліцы Галавацкага. Каля тронкі сцяга ляжала каробка з надпісам "Не адчыняць".
Міліцыянты выклікалі на месца здарэння сапёрна-піратэхнічную групу. Выявілася, што ў каробцы былі два падшыпнікі і раздрукаваная карыкатура.
Зранку 17 лістапада аператыўнікі крымінальнага вышуку затрымалі двух гамельчукоў, якія ўсталявалі сцяг. Гэта маладыя людзі 31 і 26 гадоў. На відэа затрымання бачна, як аднаго з іх валяць на зямлю і чапляюць кайданкі на рукі за спінай.
Затрыманых змясцілі ў ІЧУ і пачалі на іх крымінальную справу за хуліганства.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.
