Затрымалі мінчука, якога раней арыштоўвалі за сцяг Канады ў акне
Сцяг Канады ў акне, 2021 год / З архіва Еўрарадыё
Затрымалі мінчука Сяргея Паніна, якога раней арыштоўвалі за сцяг Канады ў акне. Дома ў яго правялі ператрус, цяпер ён знаходзіцца на Акрэсціна, паведамляюць праваабаронцы.
У 2021 годзе Панін быў асуджаны на 15 сутак адміністрацыйнага арышту. Ён жыве ў Цэнтральным раёне Мінска. У яго акне з 2020-га віселі канадскі сцяг і герб "Пагоня". Міліцыя патрабавала зняць. "Муж растлумачыў гэта тым, што ў студзені праходзіў моладзевы чэмпіянат па хакеі і ён хварэе за зборную Канады, таму і вывесіў канадскі сцяг, — расказвала жонка Сяргея Алеся. — А "Пагоня" — гэта для дэкаравання акна. І "Пагоня" — гэта гісторыка-культурная каштоўнасць". У выніку гаспадара кватэры сілавікі забралі разам са сцягам і пакаралі за "непадпарадкаванне законным распараджэнням супрацоўніка міліцыі".
Якая прычына цяперашняга затрымання, пакуль невядома.
