"З'явіцца яшчэ адна вялікая праблема": далучаць Беларусь для Расіі нявыгадна

24/05/2022 - 15:38

Ідэя пра зліццё з Расіяй не цікавая ні беларусам, ні ўладам / Reuters

Ідэя пра зліццё з Расіяй не цікавая ні беларусам, ні ўладам / Reuters

Расія вельмі абмежаваная ў рэсурсах, каб праводзіць рэферэндум аб далучэнні Беларусі. Таксама гэта стане трыгерам для сацыяльнага напружання ў самой Беларусі і не цікава расійскаму грамадству. Так пракаментаваў палітолаг Андрэй Казакевіч у эфіры Еўрарадыё навіну, што Расія такі сцэнар разглядае.

— Нельга выключаць, што такая магчымасць ёсць. Кожны, хто больш-менш разумее беларускую палітыку, ведае, што асноўная пагроза для беларускай незалежнасці і суверэнітэту ідзе ад Масквы. Хоць гэта не такая ўжо магчымая рэч. Асабліва ў сітуацыі гарачай фазы вайны ва Украіне.

Уявім, што Беларусь і Расія аб'яднаюцца, значыць, што беларусы павінны ісці ваяваць ва Украіну. Вельмі малаімаверна, што гэта выкліча энтузіязм унутры Беларусі. Мы ведаем, што нават прыхільнікі Лукашэнкі не гараць жаданнем паміраць за расійскія інтарэсы. І вядома, гэты рэферэндум можа справакаваць сур'ёзны палітычны крызіс унутры Беларусі, і без таго аслабленай крызісам 2020 года.

Для беларускіх і расійскіх уладаў гэта пагражае новым асяродкам нестабільнасці. Яшчэ на рэферэндум патрэбныя грошы.

— Можна казаць, што Расія не скупіцца на такія ініцыятывы і будзе гатовая за гэта плаціць. Але ці ёсць у яе ўвогуле такія рэсурсы, улічваючы, што вайна ва Украіне каштуе дорага?

І нарэшце, ёсць праблема, звязаная з міжнароднай рэакцыяй. У сітуацыі вайны і абвастрэння адносін паміж Захадам і Расіяй, думаю, адназначна такі крок будзе расцэнены на Захадзе як анексія. З усімі глабальнымі і вельмі глыбокімі наступствамі для беларускага грамадства і Расіі. Калі б гэта было проста, нешта такое спрабавалі б рабіць раней. Але, на шчасце для Беларусі, такая ініцыятыва будзе звязаная з вельмі вялікімі расходамі для Расіі і вельмі вялікімі рызыкамі, — працягвае Андрэй Казакевіч.

Няма сэнсу ў далучэнні Беларусі і з пункту гледжання запыту расійскага грамадства, падкрэслівае эксперт. Там сочаць менавіта за вайной ва Украіне, таму выдаць паглынанне Беларусі за перамогу не выйдзе.

— Беларусь — гэта асобны трэк. Каб перамагчы ў вайне, трэба перамагчы ў вайне, а далучэнне або спроба далучэння новай тэрыторыі можа зусім не спрацаваць у якасці кампенсацыі. Тым больш што такое далучэнне можа быць зусім няпростым і выклікаць сур'ёзны супраціў з боку беларускага грамадства. З'явіцца яшчэ адна вялікая праблема, — робіць выснову палітолаг.